د سرحدونو او قبایلو چارو وزارت د جرګو او قبایلو چارو د همغږۍ معین ښاغلي الحاج محمد یعقوب احمدزي د ناصرو قوم په هغه غونډه کې، چې د سولې د روان بهیر او تلپاتې اوربند په موخه د ننګرهار ولایت د سرحدونو او قبایلو چارو په ریاست کې جوړه شوې وه، ګډون وکړ.
د غونډې په پیل کې قومي مشرانو او مخورو د سولې او اوربند د ارزښت په اړه خبرې وکړې وې ویل: سوله د افغانانو اساسي اړتیا ده، چې باید ټول افغانان د سولې له نعمت څخه برخمن شي جګړې او ناخوالې د حل لارې نه دي باید د دې پر ځای د سولې د ټینګښت لپاره کار او هڅې وکړو، ترڅو راتلونکي نسل ته یو باثباته افغانستان په میراث کې پرېږدو.
ورپسې د سرحدونو او قبایلو چارو وزارت د جرګو او قبایلي چارو د همغږي معین ښاغلي احمدزي خبرې وکړې او د قومي مشرانو څخه یې مننه وکړه، چې په داسې حساسو شرایطو کې د موجوده نظام ترڅنګ ولاړ دي او د باعزته سولې او تلپاتې اوربند لپاره خپل غږ اوچتوي.
ښاغلي احمدزي وویل: دا ټولو ته روښانه ده، چې جګړه د حل لاره نه ده او نه له دې لارو خپلو سپېڅلو موخو ته رسېدای شو، که په رښتیا هم د هېواد د ابادۍ او سوکالي غواړو، نو باید سولې ته کار وکړو او روانې جګړې ته د پای ټکی کېږدو، له تاسو قومي مشرانو او مخورو څخه مو غوښتنه داده، چې د موجوده نظام ملاتړ وکړئ، ترڅو د تېرو ناخوالو تجربه بیا تکرار نه شي او سوله ټينګه شي.
دغه راز ښاغلي احمدزي له طالبانو هم غوښتنه وکړه، چې سولې ته لبیک ووایې او د خپلو هېوادوالو ترڅنګ دې هېواد او خلکو ته د خدمت جوګه شي.
د غونډې په پای کې ګډونوالو یو ځل بیا د خپلو خبرو په ترڅ کې د سولې او اوربند د ټینګښت په پار خپل غږ اوچت کړ.
