په پلازمېنه کابل کې د خوشحال خان لېسې د څلورنيم مياشتنۍ ازموينو څارنه
چهارشنبه ۱۳ محرم الحرام ۱۴۴۷
د سرحدونو، قومونو او قبايلو چارو وزارت د ښوونې او روزنې ریاست يو لوړ رتبه هيئت د ياد وزارت اړوند خوشحال خان عالي لېسې د زده کوونکو څخه د څلورنيم مياشتنۍ ازموينو د اخېستلو پرمهال څارنه ترسره کړه.
د ازموينې د دې څارنې پرمهال د خوشحال خان عالي لېسې د رهبرۍ غړو، استادانو او زده کوونکو سره په يو لړ ښوونېزو موضوعاتو خبرې وشوې او د وزارت لخوا د ورغلي پلاوي له لوري خپلو مسؤليتونو ته وهڅول شول، همدا راز مسؤلينو د ازموينې د روڼتيا پر بهير ټينګار وکړ او د زده کوونکو له لوري د اسلامي فرهنګي لباس په مراعت کولو يي خوښي څرګنده کړه.
په پای کې د زده کوونکو د برياليتوبونو په پار هغوی ته د غوره کاميابي دعا وشوه او د عصري زده کړو په برخه کې تري د ښو لاسته راوړنو هيله څرګنده شوه. دا په داسې حال کې ده، چې همدا تېره ورځ د خوست ولايت د قبايلو لېسې د زده کوونکو د ازموينو له بهير هم ورته څارنه ترسره شوي وه.
