په هرات او کونړ ولایتونو کې د څو مرورو کورنیو پخلاینه!
په هرات او کونړ ولایتونو کې د جلا ناستو پر مهال دوه شخړې چې له کبله یې دوه تنه وژل شوي او یو بل تن ژوبل شوی و، د یادو ولایتونو د سرحدونو، قومونو او قبایلو چارو ریاستونو، قومي مخورو او علماء کرامو په هلوځلو په دوستۍ بدلې شوې.
د دغو شخړو له ډلې لومړۍ یوه یې په هرات ولایت کې د دوو کورنیو ترمنځ د خپلمنځي اختلاف له امله پېښه شوې وه، چې دوو تنو ته مرګ ژوبله پکې اوښتې وه. د دغې شخړې د حل پر مهال ښکېلو لوریو د یاد ولایت د سرحدونو، قومونو او قبایلو چارو رئیس مولوي جمال الدین عمري، قومي سپین ږیرو او دیني عالمانو ته واک ورکړ او مرکچي پلاوي د دوی په هکله د خیر پرېکړه وکړه. یاده پرېکړه دواړو خواوو له اورولو سره سم ومنله او سولې ته راضي شول.
دویمه شخړه بیا د کونړ ولایت په سرکاڼو ولسوالۍ کې د دوو کورنیو ترمنځ پېښه شوې وه، چې له امله یې یو تن ژوبل شوی و او د طرفینو ترمنځ یې ژور اختلافات پیدا کړي وو. یاده منازعه هم تېره ورځ د یاد ولایت د رئیس ملا تحمیدالله غازي او قومي مشرانو په هلوځلو حل شوه، چې په ترڅ کې یې دواړه خواوې سولې ته رابلل شوې او ترمنځ یې د اخوت ورورولۍ پرېکړه وشوه.
