په فارياب ولايت کې د دوو کورنيو ترمنځ هغه دښمني په دوستۍ بدله شوه چې يو بل يې سره وژلي وو
چهار شنبه ۲۴/۲/۱۴۴۶
د فاریاب ولایت د سرحدونو، قومونو او قبايلو چارو د رئيس مولوي محمد مير صارم په مشرۍ او د يو لوړ رتبه هيئت په ملتيا د ولسي سپين ږيرو، ځايې مخورو، ديني عالمانو او د اسلامي امارت د مسؤلينو په شريکو هلوځلو، دغه اوږده شخړه هواره شوه او طرفینو يو بل ته د سولې غاړه ورکړه.
دا په داسې حال کې ده چې د فارياب ولايت المار ولسوالي په غلبله سيمه کې د دوو کورنيو ترمنځ د پيښې شوې دښمنۍ له امله له دواړو لوریو يو يو کس وژل شوی و او د دوی ترمنځ ناندرۍ یې را پورته کړې وې، د یاد هیئت له هڅو وروسته ښکيلو طرفونو ژمنه وکړه چې نور به د ورورۍ په فضا کې خپله دوستي پالي او هيڅ کله به بیا یو بل ته ستونزې نه جوړوي.
د یادونې ده چې د سرحدونو، قومونو او قبايلو چارو وزارت د خپلو محلي ادارو او د شخړو حل کمیسیونونو په منځګړیتوب تيره ورځ هم د هيواد په بيلابيلو ولايتونو کې دې ته ورته شخړې حل کړې، چې پکې بلخ، بادغيس، زابل او غزني ولايتونه شامل وو.
