په بلخ او ارزګان ولايتونو کې دوه ولسي دُښمنۍ په دوستي بدلې شوې!
سشنبه ۱۵/۲/۱۴۴۶
د سرحدونو، قومونو او قبایلو چارو وزارت د ولایتي واحدونو د مسؤلینو، قومي سپین ږیرو او دیني عالمانو په منځګړیتوب د ارزګان ولايت په چورې ولسوالۍ او د بلخ ولايت په چمتال ولسوالیو کې دوه جلا جلا شخړې هواري کړې او دواړه لوري یې د وروڼو په څېر ژوند کولو ته رابللي.
د دغو شخړو له ډلې لومړی یوه یې د یاد ولایت په چورې ولسوالۍ کې (۴۰) کاله مخکې د يوه کلي او د بارکزيو د یوه خېل ترمنځ د ځمکې پر سر پېښه شوې وه، چې له يوه طرفه پکې یو کس وژل شوی او دوه نور ټپيان شوي وو. دغه شخړه د یاد ولایت د سرحدونو، قومونو او قبایلو چارو د آمر حاجي ملا عبدالهادي حاجي امين، نورو مسؤلینو او قومي سپين ږيرو په هلو ځلو حل شوه او دواړه لوري د ورورۍ په ټغر راټول شول.
همدارنګه د بلخ په چمتال ولسوالۍکې یوه بله شخړه چې دوو کورنیو پکې له مودو راهیسې ژور اختلافات درلودل د دغه وزارت د ولایتي مسؤلینو او قومي سپین ږیرو په منځګړیتوب حل شوه او دوښمني یې په دوستۍ بدله شوه. د یادونې ده، چې دغه وزارت د اړوندو مسؤلينو او سیمه ییزو مشرانو په همکارۍ سلګونه دې ته ورته شخړې او دښمنۍ هوارې کړي او د ولسونو ترمنځ د آرام چاپیریال رامنځته کولو په برخه کې چټکې هلې ځلې کوي.
