په بادغیس ولایت کې له علماوو اوقومي مخورو سره ناسته وشوه
پنج شنبه رجب المرجب /۱۸/۱۴۴۴
د سرحدونو، قومونو او قبایلو چارو وزارت د لوړ رتبه هیئت د رسمي سفر په ترڅ کې په بادغیس ولایت کې خلکو ستونزو ته د رسیدګي او یووالي په موخه یوه لویه ولسي غونډه جوړه شوه. په یاده غونډه کې د همدغه وزارت د جرګو او قبایلي چارو معین، د پلان او پالیسۍ رئیس، مل هیئت، د بادغیس ولایت والي، قومي مشرانو، دیني عالمانو او د ټولو ملکي ادارو مسؤلینو ګډون کړی وو. د غونډې په پیل کې د یاد ولایت د سرحدونو، قومونو او قبایلو چارو رئیس مولوي محمد قاسم د وزارت پلاوي، قومي مخورو، علماوو او ټولو ګډونوالو ته هرکلی ووایه او زیاته یې کړه چې د اسلامي نظام تر ټولو لوی مسؤلیت د قومونو او خلکو یووالی ساتل دي. د بادغیس ولایت والي مولوي عبدالصمد جاوید په خپله وینا کې وویل: مغرضې کړۍ هڅه کوي چې د دروغجنو تبلیغاتو په واسطه د نظام او ولس تر منځ واټن پیدا کړي خو ا.ا.ا غیږ ټولو هیوادوالو ته خلاصه ده او دا نظام به موږ او تاسو په ګډه او اتفاق سره ساتو. د ناستې په جریان کې د بادغیس ولایت د قومي مشرانو او علماوو په استازیتوب څو تنو خبرې وکړې ويې ویل: د اسلامي نظام تحکیم د افغانستان د هر وګړي یوه هیله ده او دا نظام له ډیرو قربانیو وروسته منځ ته راغلی دی، پیروي او ترڅنګ یې درېدل په ټولو لازم دي. دوی له حکومت څخه د لویو لارو د رغولو، روغتیا او اوبو په برخه کې د مرستې غوښتنه وکړه.د یاد وزارت د جرګو او قبایلي چارو د همغږۍ معین الحاج ملا عبدالخالق عابد غونډې ته د خپلې وینا په ترڅ کې وویل: ډېر د خوښۍ ځای دی چې افغانانو ته الله ج یو اسلامي او خپلواک نظام ورکړی دی، چا چې د دې نظام د اقامې لپاره قربانۍ ورکړې دي، د هغوی باید قدر وشي، پر یتیمانو یې شفقت وشي او د ژوندیو یې پالنه وشي، دا هغه ملت دی چې په تېرو شلو کلونو کې یې د مجاهدینو هر ډول مرسته کړې ده. نوموړي د دوی ټولو د ستونزو په اړه ډاډ ورکړ او زیاته يې کړه چې دا وزارت د خلکو غږ دی او موږ به ستاسو غوښتنې تر اړوندو مسؤلینو رسوو. غونډه د هیواد د آبادۍ په دعا کولو سره پای ته ورسېده.
