په بادغیس او لوګر کې دوې شخړې د جلا ناستو پر مهال هوارې شوې!
چهارشنبه ۲/۲/۱۴۴۶
په بادغیس او لوګر ولایتونو کې د بېلابېلو ناستو په پرمهال دوې شخړې چې له کبله یې څلور تنه ژوبل شوي وو، د دوو قومونو او کورنیو ترمنځ یې ډېرې ناندرۍ او اختلافات پیدا کړي وو، تېره ورځ د جلا ناستو په ترڅ کې د یادو ولایتونو د سرحدونو، قومونو او قبایلو چارو ریاستونو او ولسي سپین ږیرو په منځګړیتوب حل شوې. د دغو شخړو له ډلې لومړۍ یوه یې د بادغیس په آبکمري ولسوالۍ کې د دوو قومونو د جلا کورنیو ترمنځ د خپلمنځي مسئلې پر سر د فزیکي جګړې له امله یوه میاشت مخکې رامنځته شوې وه چې د جګړې په پایله کې یې له دواړو خواوو څخه یو یو تن ټپیان شوي وو او دویمه یې بیا د لوګر ولایت د مرکز اړوند د خضر بازار سیمې په مربوطاتو کې د یوه موټر او موټرسایکل د ټکر له وجهې پېښه شوې شخړه وه، چې دوه تنه پکې زخمي شوي وو. په دغو دواړو ناستو کې مسؤلینو او قومي مشرانو بښنه د اسلامي اصولو یوه بنسټیزه برخه یاده کړه ویې ویل چې عفوه د ټولنیزو اړیکو د ټنګښت سبب کېږي او د ولسونو ترمنځ نږدېوالي رامنځته کوي. یادو مشرانو او مسؤلینو د دواړو شخړو په اړه د سولې پرېکړې وکړې، ښکېل لوري پرې خوښ شول او یو بل ته یې د ورورۍ غېږي ورکړې.
