ننګرهار کې ۱۳ کلنه، ارزګان کې يو کلنه او جوزجان کې هم یوه شخړه حل شوه
سه شنبه۲۷ ذوالحجه ۱۴۴۶
د ننګرهار ولايت سپين غر ولسوالۍ په مامند سيمه کې د يوه کس د وژنې له امله هغه راپورته شوې ۱۳ کلنه شخړه حل شوه، چې د دواړو کورنيو ترمنځ يې اوږدې ستونزې را ولاړې کړې وې.
د ياد ولايت د سرحدونو، قومونو او قبايلو چارو رياست مسؤلينو د قومي سپين ږيرو، ديني عالمانو او ځايي خلکو په همکاري د يوې جوړې شوې غونډې په ترڅ کې ښکېل اړخونه سولې ته راضي کړل او ترمنځ يې د يوې شرعي پرېکړې له مخې روغه وشوه.
بلخوا د ارزګان ولايت په مرکز ترينکوټ کې د دې ولايت د مرستيال والي په حضور کې د سرحدونو، قومونو او قبايلو چارو آمريت آمر د دوو کورنيو ترمنځ د يوه کال په دوام هغه رامنځته شوې شخړه هواره کړه، چې يو کس پکې وژل شوی و او دوه نور پکې ټپيان شوي وو.
همدا راز په جوزجان ولایت کې د ترافيکي پيښې له امله رامنځته شوې شخړه د ياد ولايت د سرحدونو، قومونو او قبايلو چارو رياست په مشري د قومي مخورو او علماوو په همکاري حل او دواړو خواوو روغه سره وکړه، د دغه پيښې پرمهال يو کس وژل شوی و، چې مسؤلينو يې موضوع په سوله ييزه توګه حل او طرفينو د ورورۍ ژوند پيل کړ.
