سمنګان کې د ۳ کلنې شخړې ترڅنګ بغلان او نيمروز ولايتونو کې ورته شخړې حل شوې
يکشنبه ۱۰ محرم الحرام ۱۴۴۷
د بغلان ولايت دوشي ولسوالۍ په سيا دره سيمه کې د دغه ولايت د سرحدونو، قومونو او قبايلو چارو رياست له لوري د دوو کورنيو ترمنځ د ځمکې د ملکيت پر سر هغه راپورته شوې شخړه هواره شوه، چې له امله یې څلورو تنو ته مرګ ژوبله اوښتې وه او دواړه لوري یې له ګڼو ستونزو سره مخ وو.
د دغه شخړې پرمهال دواړو لوريو ګڼې ستونزې ګاللې وې، د خپلمنځي اختلافاتو ترڅنګ د دوی د بدي په نتیجه کې يو کس وژل شوی و او درې تنه ټپيان شوي وو، چې بلآخره د اسلامي امارت مشرانو د يوې شرعي فيصلې وروسته ښکېل اړخونه سولې ته چمتو کړل او د ورورولۍ په فضا کې يې ګډ ژوند پيل کړ.
ورته مهال د نيمروز ولايت په دلارام ولسوالۍ کې د دوو قومونو ترمنځ پېښه شوې شخړه د ياد ولايت د سرحدونو، قومونو او قبايلو چارو رياست مسؤلينو او قومي مشرانو په هلوځلو حل او طرفينو له دوښمنۍ لاس واخيست. د يادې شخړې له کبله يو کس وژل شوی او څو تنه ټپيان شوی هم وو.
همدا راز د سمنګان ولايت د سرحدونو، قومونو او قبايلو چارو رياست استازو د ولسي خلکو او مخورو په مرسته د ياد ولايت په دره صوف ولسوالۍ کې د دوو کورنيو ترمنځ هغه درې کلنه شخړه هواره کړه، چې دواړو خواوو ته يي لويې ستونزې را ولاړې کړې وي او وخت نا وخت به يې ترمنځ د اختلافاتو د رامنځته کېدو سبب ګرځېده.
