د هیواد د ټولو قومونو د ستونزو حل زموږ مسؤلیت دی
د ننګرهار ولایت په بهسودو ولسوالۍ کې د کوچيانو د صحي ستونزو د رفع کولو لپاره یو روغتیایي کلینیک چې پخوا یې کارونه پیل شوي وو، رسماً پرانیستل شو. یاد کلینیک د ننګرهار ولایت د سرحدونو، قومونو او قبایلو چارو ریاست په هڅو د جي پایکو نړیوالې مؤسیسې په مالي ملاتړ او همکارۍ جوړ شوی دی چې د نارینه او ښځينه ډاکترانو او واکسیناتورانو له لوري به کوچیانو ته روغتیایي خدمات وړاندې کوي.
د افتتحاح په مراسمو کې د سرحدونو، قومونو او قبایلو رئیس حاجي رحمت الله غازي عمر، د کوچیانو سرخیلانو، علماءکرامو، او د سیمې ځوانانو ګډون کړی وو. په یادو مراسمو کې د سرحدونو، قومونو او قبایلو چارو رئیس ښاغلي غازي عمر وویل: زموږ هدف د هیواد د ټولو قومونو ستونزې اورېدل او ورته رسیدګي کول دي. هغه زیاته کړه: کوچي قشر له خدمتونو محروم دی، دوی ته د اسانتیاوو د برابرولو په برخه کې موږ پوره کوښښ کوو.
د کوچي قومونو په استازیتوب څو تنو مشرانو د یاد ریاست ستړیاوې او خدمتونه وستایل او ویې ویل: کوچیان له ډېرو خدمتونو څخه بې برخې پاتې دي، د اسلامي امارت په خاصه توګه د سرحدونو، قومونو او قبایلو چارو ریاست له مسؤلینو څخه منندوی یو چې موږ ته یې صحي اسانتیاوې برابرې کړې دي، دوی له روغتیایي کارکوونکو سره د مرستې په برخه کې د هر راز همکارۍ ډاډ وړاندې کړ.
