د نیمروز ولایت د یو شمېر قومي مشرانو او مخورو ستونزې واورېدل شوې!
د سرحدونو او قبایلو چارو وزیر ښاغلي محب الله صمیم نیمروز ولایت ته د خپل سفر په ترڅ کې د یاد ولایت د بېلابېلو ولسوالیو قومي مشرانو او مخورو سره وکتل، او د دوی ستونزې یې له نږدې واورېدې.
په دې کتنه کې یادو مشرانو د خپلو یو لړ سیمه ییزو ستونزو شریکولو تر څنګ، د سرحدونو او قبایلو چارو وزیر ښاغلی محب الله صمیم یومجرب کدر وباله او نمیروز ولایت یې ته د نوموړي له سفر څخه مننه وکړه، چې له خپلو ولسونو سره یې له نږدې وکتل او د دوی ستونزې یې واورېدې نوموړو وویل: د قومي مشرانو او مخورو غوښتنه داده، چې د سرحدونو او قبایلو چارو وزارت د مشرتابه په همکارۍ د نظام د پایښت، سولې او ملي یووالي د ټینګښت، د هېواد د پرمختګ او سوکالۍ لپاره کار وکړي.
دغه راز قومي مشرانو ډاډ ورکړ، چې له وزارت سره به خپلو همکاریو ته دوام ورکړي، په ګډه به د نظام د بقا لپاره کار وکړي او د وزارت په ټولو جرګو کې به فعاله ګډون وکړي.
ورپسې ښاغلي محب الله صمیم د یادو مشرانو له ملاتړ او سلا مشورو څخه د مننې ترڅنګ وویل: د سرحدونو او قبایلو چارو وزارت د یو مهم ولسي وزارت په توګه دنده لري، چې هر وخت د خپلو ولسونو ستونزې او سلامشورې واوري، هڅه به وکړم چې د قومونو منځ ته ورشم، سره منسجم یې کړم، د نظام، جمهوریت، د هېواد د ملي ګټو او ملي ارزښتونو ملاتړ ته یې راوبولم.
په پای کې ښاغلي صمیم یادو قومي مشرانو او مخورو ته ډاډ ورکړ، چې یاد ولایت ته مو د راتګ موخه ستاسو قومي مشرانو او مخورو ستونزو اورېدل دي، چې انشاالله په ګډه به ورته د حل لارې چارې پیدا کړو.
