د مقام د دفتر رئیس د وزارت کارکوونکو ته اصلاحي بیان وړاندې کړ
یکشنبه /۲۵/ذوالقعدة /۱۴۴۵
د سرحدونو، قومونو او قبایلو چارو وزارت د مقام د دفتر رئیس الحاج مولوي نیاز محمد تقي د یاد وزارت کارمندانو او مسؤلینو ته د اسلامي عقیدې، اخلاص او مسؤلیت اړوند اصلاحي بیان وړاندې کړ چې پر مهال یې د یاد وزارت د دعوت او ارشاد رئیس الحاج مفتي شفیع الله ثاقب او نورو مسؤلینو هم حضور درلود.
د دغې ناستې په وخت کې د دفتر رئیس ښاغلي تقي د ټولو دنیوي امورو د ترسره کولو په وخت کې د نیت سمون اړین وباله او ویې ویل چې د ټولو عملونو ثواب په نیت پوري اړه لري، نو موږ او تاسې ته په کار ده چې هر کارونه مو د الله تعاليﷻ د رضا په نیت وکړو تر څو هم دنیوي او هم اخروي ګټه پرې مرتبه وي.
نوموړي د خپلو خبرو پر مهال وویل: موږ او تاسې ته الله تعالیﷻ داسي یو نظام راکړی چې خپل ملت د اسلام مبارک دین ته را بولي، د دې نظام د هر کارکوونکې په شکل کې اوس د نبی علیه السلام څېره ښکارېږي ځکه دې خلکو د هغه ﷺ ټول سنتونه عملي کړي چې دا په دې خاوره د الله تعالی ﷻ یو لوی احسان دی. هغه زیاته کړه: اسلامي امارت لکه څنګه چې د ملت نورې ګټې یې خوندي کړي، امنیت یې تأمین کړی، پروژې یې عملي کړی او اسلامي نظام یې قائم کړی تر څنګ یې د دې نظام چلونکو ته د معنوي تزکیې پروګرامونه هم په لاره اچولي دي، چې د دعوت او ارشاد او امر بالمعروف یې ښې بېلګې دي.
د مقام د دفتر رئیس په اخلاص د کارونو ترسره کولو ترڅنګ ټینګار وکړ چې مسؤلین دي خپلو دندو ته پوره پاملرنه وکړي ځکه چې په اسلامي نظام کې ډېر کوچنی مسؤلیت هم ستاسې لپاره یو ستر وقار دی او په تقوا سره ترسره کول یې د الله ﷻ د رضامندي سبب کېږي.
