د سرحدونو، قومونو او قبایلو چارو وزارت اړوند د سرحدي پلټنو نوی معین معرفي شو
یکشنبه/۴/جمادي الثاني/۱۴۴۷
نن له غرمې وړاندې د سرحدونو، قومونو او قبایلو چارو وزارت د غونډو په تالار کې د امیرالمؤمنین شیخ صاحب حفظه الله تعالی په حکم د ارزګان پخوانی والي مولوي عنایت الله شجاع د یاد وزارت د سرحدي پلټنو د نوي معین په توګه د یوې ناستې په ترڅ کې داسې مهال معرفي شو چې د یاد وزارت وزیر ملا نورالله نوري، مسلکي معین مولوي احمد طه قادري، د دفتر رئیس مولوي نیازمحمد تقي، د دعوت او ارشاد رئیس مولوي شفیع الله ثاقب او نورو مسؤلینو حضور درلود.
د ناستې د پیل په وینا کې د سرحدونو، قومونو او قبایلو چارو وزیر ښاغلي نوري د نیتونو او عملونو د اصلاح او مسؤلیت په هکله خبرې وکړې ویې ویل: مسؤلیت یوه ابتلاء ده، موږ هم په سختۍ او هم په اسانۍ کې ازمویل کېږو، پرون د سنګر په سختیو کې ازمویل کېدو او نن مو په چوکۍ او منصب کې ازموینه ده. هغه په کارکوونکو او مسؤلینو غږ وکړ چې د نیتونو او عملونو اصلاح ته پام وکړي ځکه چې همدا د مؤمنانو د نجات لاره ده. نوموړي د پخواني معین له خدمتونو او ستړیاوو ستاینه وکړه او نوي معین ته یې د هرکلي ترڅنګ په کارونو کې د توفیق دُعا وکړه.
ورپسې نوي ټاکل شوي معین مولوي شجاع خبرې وکړې ویې ویل: دا یو سعادت دی چې الله تعالی د اسلامي امارت په ټولګي کې داخل کړي یو. هغه د خلفاء راشدینو د مسؤلیتونو ځینې بیلګې وړاندې کړې زیاته یې کړه: مسؤلیت یو دروند نوم دی او معنا یې داده چې له تا څخه به د خپل کار په اړه سوال او پوښتنه کېږي. نوموړي تقوا د مؤمن د بري راز وباله او په ورسپارل شوې دنده کې یې د توفیق او دُعا غوښتنه وکړه.
