د سرحدونو، قومونو او قبايلو چارو وزارت لخوا نن په پکتيا ولایت کې لويه ولسي غونډه وشوه
پنج شنبه ۱۴/۴/۱۴۴۶
قومي مخورو د خپلو خبرو پر مهال له اسلامي امارته وغوښتل چې سیمه ییزې ستونزې ورته حل کړي او په اړه یې اقدامات تر سره کړي، دوی زیاته کړه چې د پکتیا ولایت ولسونو د اسلامي نظام د قیام لپاره قربانۍ ورکړې دي که اړتیا یې شوه بیا هم د اسلامي امارت تر څنګ درېږي.
همدا راز د جرګو او قبايلي چارو د همغږۍ مرستیال الحاج مولوي محمد علي جان احمد وويل: ا.ا.ا د ولس خدمت خپل لومړیتوب ګڼي هڅه کوي چې د ولسونو ستونزې واوري او د حلولو په موخه یې کوټلي ګامونه واخلي، نوموړي زیاته کړه: نننی اسلامي نظام پر افغانان د الله ج له لوري یو لوی نعمت دی، دا د خوښۍ ځای دی چې د هیوادوالو ستونزې او منازعې د اسلامي شریعت په چوکاټ کې حل مومي.
د جرګو او قبایلي چارو د همغږۍ رئيس مولوي نيک محمد افغاني په خپلو خبرو کې په دې ټینګار وکړ چې د ولسونو کامیابي په اتفاق او همغږۍ کې ده، نوموړي زیاته کړه دا د شکر ځاى دی چې په هيواد کې ټول ولسونه د یووالي او اتحاد پر ټغر را ټول دي.
د غونډې په پای کې د وزارت د شخړو د حل سلاکار مولوي محمد آجان رهبر او د اطلاعاتو او عامه اړیکو رئیس مفتي تسلیم الله حقاني زیاته کړه: د تيرې ادارې پر مهال د خلکو نوامس او عفت خوندي نه وو، نوموړي پر خلکو غږ وکړ چې ددې نظام د ثبات لپاره اتحاد او یووالي اړتیا دی، دوی زیاته کړه: ولس ته ددې غونډې له لارې ډاډ ورکوو، چې حاکم نظام ستاسو هرې ستونزې ته متوجه دی او د حل هڅه یې کوي.
په یاده غونډه کې د سرحدونو، قومونو او قبايلو چارو وزارت د جرګو او قبايلي چارو د همغږۍ مرستیال الحاج مولوي محمد علي جان احمد، د جرګو او قبایلي چارو د همغږۍ رئیس مولوي نيک محمد افغاني، د شخړو د حل سلاکار مولوي محمد آ جان رهبر، د اطلاعاتو او عامه اړيکو رئيس مفتي تسلیم الله حقاني، د پکتيا ولايت والي مولوي مهرالله حماد، محلي مسؤلینو، سلګونه دیني عالمانو، قومي مخورو او عامو خلکو ګډون درلود.
