د کابل ولایت په قرباغ ولسوالي کې لویه ولسي غونډه تر سره شوه
سه شنبه ۲۳ ربيع الآخر ۱۴۴۸
د سرحدونو، قومونو او قبايلو چارو وزارت د جرګو او قبايلي چارو د همغږي رئيس مولوی محمد اجان رهبر د مل پلاوي په مشري د کابل په قره باغ ولسوالي کې (د اسلامي نظام تر چتر لاندي د شريعت د نفاذ او همغږۍ) تر سرلیک لاندې یوه لویه غونډه ترسره کړه چې پرمهال یې ديني عالمانو، قومي مشرانو، متنفذينو او ځوانانو ګډون کړی وو.
د دغې غونډې پرمهال د وزارت د جرګو او قبايلي چارو د همغږۍ رئيس مولوي محمدآجان رهبر په خپلو خبرو کې وویل، چې اوس وخت را رسېدلی ترڅو له خپل نظام سره په ګډه د څلوېښتو کلونو ناخوالي او ناوړه دودونه له منځه یوسو او په یوه غږ د اتحاد په رسۍ منګولې ولګوو، نوموړي زیاته کړه: ترڅو چې د مسلمانانو ترمنځ یووالی او اتحاد وي هیڅوک پر هغوی حکومت نه شي کولای.
په دغه ولسي غونډه کې ديني عالمانو او قومي مشرانو په خپلو خبرو کې وویل: د مسؤلينو او خلکو ترمنځ د دغه ډول غونډو برابرول د ولس او حکومت تر مابین واټن ختموي او د یووالي غوټې نوې هم ټینګېږي.
قومي مشرانو همدارنګه د قره باغ ولسوالي د شل بستريز روغتون پراخولو، سړک، اوبو رسولو شبکو او کرنې اړوند ستونزې شریکې کړې او له حکومت څخه یې د پاملرنې غوښتنه وکړه.
