د هيواد په شپږو ولايتونو کې د ولسواليو په کچه ولسي غونډې ترسره شوې
پنجشنبه ۱۵ جمادی الأولی ۱۴۴۷
د سرحدونو، قومونو او قبایلو چارو وزارت د پلان سره سم د هيواد په مختلفو ولایتونو کې له ولسي خلکو سره د ولسي یووالي او ستونزو د اوريدو په موخه د پيل شويوغونډو په دوام، د دې اونۍ په وروستيو کې د ارزګان ولايت په چارچينو ولسوالي، د کنړ ولايت په دانګام، د سمنګان په حضرت سلطان، د غزني په خوګياڼو، د بادغيس په غورماچ او لوګر ولايت په ازره ولسوالي کې له عامو خلکو سره پراخه غونډې ترسره شوې.
د يادو غونډو پرمهال سيمه ييزو مشرانو په تېرو څلورو کلونو کې د اسلامي امارت لاسته راوړنې وستايلې او د خپلو لومړنيو ستونزو د شريکولو ترڅنګ يې له مسؤلينو وغوښتل، چې د ولسي يووالي او ملي وحدت لپاره داسې غونډې جاري وساتي ترڅو د ولس او حکومت ترمنځ هېڅ فاصله پاتې نه شي.
د دغو غونډو په ترڅ کې مسؤلینو د اسلامي امارت څخه د خلکو د ملاتړ هرکلی وکړ او ويې ويل: د نظام مسؤلينو شپه او ورځ د خپلو خلکو په خدمت کې دي او د همدغسې غونډو له لارې ورسره هره لويه او وړه ستونزه په ډاډه زړه شريکولای شي. يادو مسؤلينو د امیرالمؤمنین حفظه الله د بدو دودونو او ناوړه رواجونو د مخنیوي فرمان هم تشریح کړ او د غونډې په ګډونوالو يې وويشه. دوی همداراز له خلکو وغوښتل، چې د ياد فرمان په عملي کولو کې هېڅ دريغ ونه کړي.
