په پنجشېر کې دوې کورنۍ له ۷ کلنې بدي وروسته سره پخلا شوې
چهارشنبه/۱۶/ جمادی الاول ۱۴۴۸
د پنجشیر ولایت د سرحدونو، قومونو او قبایلو چارو آمریت د یاد ولایت په حصه اول ولسوالۍ کې د دوو کورنیو ترمنځ ۷ کلنه دښمني په دوستي بدله کړه او د طرفینو ترمنځ یې د سولې پرېکړه وکړه.
دغه شخړه چې له یوه لوري څخه پکې یو کس په قصدي ډول وژل شوی و، له اوو کلونو راهیسې یې د دواړو خواوو ترمنځ په اختلافاتو او جنجالونو سربېره یو بل ته د اوو میلیونه افغانیو په ارزښت مالي زیانونه هم اړولي وو، چې له نېکه مرغه پرون یې د یوې دودیزې جرګې پرمهال پخلاینه وشوه.
د پخلاینې د غونډې پرمهال پر ولایتي مسؤلینو سربېره علماء کرامو، سیمه ییزو متنفذینو او ښکېلو لورو ګډون کړی وو، چې د شخړو د حل کمېټې له لوري له دواړو خواوو څخه اختیار خطونه واخیستل شول، او د موضوع له پوره بررسې او څېړنې وروسته یې په اړه د خیر فیصله وشوه. دا چې پرېکړه د دواړو د خوښي وړ وګرځېده په دې سره یې یو بل ته بښنه وکړه او سره غاړه غړۍ شول.
