ډېورنډ فرضي کرښې ته څيرمه مېشتو خلکو ته د خدمتونو وړاندې کولو په موخه د مرکزي کمېټې ناسته
پنجشنبه ۱ ذوالحجه ۱۴۴۶
د سرحدونو، قومونو او قبايلو چارو وزارت د د فتر رئيس مولوي نياز محمد تقي په مشري د سرحدي خدمتونو مرکزي کمېټې د غړو په شتون کې نن د ننګرهار، نورستان او پکتيا ولايتونو په یو شمېر سرحدي ولسواليو کې د خدماتي پروژو د پيل او عملي چارو د ترسره کولو په موخه د شته ستونزو د ارزونې په حل لارو مشورتي ناسته وکړه.
په دغه مشورتي ناسته کې د سرحدي خدمتونو مرکزي کمېټې مشر، استازو او د یادې کمېټې تخنیکي غړو د نورستان ولايت په کامدېش او برګ مټال ولسواليو کې د څو پروژو د پيل خبر ورکړ، چې پکې د مسجدونو او ديني مدرسو رغول شامل دي، همداراز په پکتيا کې د اوبو څاګانو پر کېندلو او ننګرهار کې هم د يو شمېر ستونزو پر حل بحث وشو.
د يادونې وړ ده، چې د سرحدونو، قومونو او قبايلو چارو وزارت څه موده وړاندې هم د ننګرهار په اچين، دوربابا، لعل پورې، مومندرې او خوګياڼو ولسواليو کې د ۷۱ ميليونه افغانيو په لګښت ځينې پروژې د تطبيق په موخه وړاندې کړې دي
