د نورستان ولایت د قومي مشرانو ستونزې واورېدل شوې!
د سرحدونو او قبایلو چارو وزیر ښاغلي محمد شفیق ګل آغا شېرزي د روان لمریز کال د کب میاشتې پر ۳ مه نېټه په ولسي جرګه کې د نورستان ولایت د خلکو له استازې آغلې قمر بانو اکبري او یو شمېر قومي مشرانو سره د خپل کار په دفتر کې وکتل.
په یاده کتنه کې، چې د وزارت اړوند معینان صاحبان هم حاضر و، راغلو قومي مشرانو او د خلکو استازې یو لړ سیمه ییزې ستونزې، چې د زده کړو څخه د ځوانانو د پاتې والي، ناامنیو او د روغتیايي مرکزونو د نه شتون په برخه کې وې د وزارت له مشرتابه سره شریکې کړې او د حل لارو چارو په موندلو یې ټینګار وکړ.
همدا راز نوموړو دا هم وویل: چې د یاد ولایت د سرحدي سیمو ځوانان دې د وزارت په اړوند لېسو کې د زده کړې ترسره کولو په موخه شامل شي.
ورپسې د سرحدونو او قبایلو چارو وزیر ښاغلي محمد شفیق ګل آغا شېرزي په خپلو خبرو کې د یادو مشرانو ستونزې پر ځای وبللې او د دوی له راتګ څخه یې مننه وکړه، وې ویل: ستاسو درنو مشرانو ستونزو ته رسیدنه او حل لارې چارې موندل زموږ مسؤلیت دی، چې انشا الله ستونزې به مو د تل په څېر د حل په موخه مو د اړوند ادارو سره شریکې کړم او په دې برخه کې به خپلې هلې ځلې ونه سپموم.
