له پښتنو او بلوڅو وروڼو سره د پیوستون ورځې لمانځنه
د لمانځنې په دې مراسمو کې د سرحدونو او قبایلو چارو وزارت د جرګو او قبایلي چارو د همغږۍ معین ښاغلي محمد یعقوب احمدزي، د وزارت سلا کارانو، رئیسانو او کار کوونکو، د ملي شورا د دواړو خونو یو شمېر غړیو، ادبي او فرهنګي شخصیتونو، دعلومو اکاډمۍ غړیو، د کابل پوهنتون استادانو، مدني فعالانو، قومي مشرانو، د بېلابېلوقومي شوراګانو رئیسانو او استازو، له کوزې پښتونخوا او بلوچستان څخه قومي مشرانو او ځوانانو، خویندو او د رسنیو استازو ګډون کړی و.
لمانځغونډه د عظیم الشان قران د څو مبارکو ایتونو په تلاوت پیل شوه، ورپسې د وزارت د جرګو او قبایلي چارو د همغږۍ معین ښاغلي محمد یعقوب احمدزي له پښتنو او بلوڅو وروڼو سره د پیوستون ورځې د مخینې او دا، چې دا ورځ څنګه لمانځل کېږي معلومات وړاندې کړل.
وې ویل: موخه دا ده،چې د پښتنو او بلوڅو د حقه حقوقو او د هغو دستونزو د حل په اړه سره راټول شو،او د هغوی غږ نړېوالو ته ورسوو: زیاته یې کړه موږ همېشه دا غږ نړېوالې ټولنې ته رسولی، چې د بشر حقوقو په رڼا کې دوی ته خپل حقوق ورکړل شي.
ښاغلي احمدزي دا هم وویل چې موږ غواړو له خپلو ګاونډیو سره په سوله ییزه فضا کې ژوند وکړو،سوله هم د ځان او هم د خپلو ګاونډیانو لپاره غواړو.
ده د جګړې او ناخوالو د پای ته رسولو لپاره چې د فرضي کرښې دواړو غاړې پراته ولسونه ګواښوي د یووالي په لاپیاوړتیا ټینګار وکړ وې ویل، چې باید د پردیو لخوا پر موږ تپل شوې جګړه د جرګو او مرکو له لارې حل کړو، خپل یووالی وساتو، یو بل وزغمو، واړه مسایل څنډې ته کړو اود لویو ملي مسایلو په اړه فکر وکړو.همدا رازیې ټینګار وکړ، چې د یو ملي بهیر په توګه باید په ټاکنو کې برخه واخلو او خپل د خوښې نوماند ته رایه ورکړو.
ورپسې د بلوڅو د سراسري شورا رئیس او د مشرانو جرګې غړي ښاغلي محمد نادر بلوڅ، د قبایلو د سراسري اتحادې رئیس ښاغلي ز رجان شینواري، علمي او فرهنګي شخصیت اوعلومو اکاډمی سلاکار استاد حبیب الله رفیع، د وزیرستان د قبایلو شورا رئیس ښاغلي ډاکتر مسود حیات، د مشرقي شورا رئیس او د وزارت سلا کار ښاغلي عبدالخالق حسینی پشه یي، د ترکمن سراسري شورا رئیس ښاغلي قربان مراد مراد، ښاغلي غیرت، د قبایلي ځوانانو په استازیتوب ښاغلي اسد الله کلیوال په وارسره پخپلو خبرو کې د پښتنو او بلوڅو میړنیو قومونو د مبارزو،د انګرېزانو د واکمنۍ او بیا را وروسته له هغې پردغو دواړو قومونو د ظلمونو،زرګونو پښتنو او بلوڅو د تري تم کېدو،زنداني کېدو، کور او کلي د ورانېدو، د ژوند او دژوندانه له اسانتیاوو څخه ددوی د بې برخې کېدو او نورو ناخوالو په اړه خبرې وکړې.د ټولو ستونزو د حل لپاره یې په یووالي ټینګار وکړ، نوموړوهمدا راز د حکومت له مشرتابه څخه د سرحدونو او قبایلو چارو وزارت ته د لا ډېرو امکاناتو د برابرولو غوښتنه وکړه تر څنګ یې په ټاکلي وخت د ټاکنو په ترسره کېدو ټینګار وکړ.دوی د سولې د روان بهیر په اړه هم ورته نظرونه درلودل، ویلی چې موږ دا څلویښت کاله د سولې په ارمان یو،سوله غواړو دسولې تږي یو،خو داسې سوله چې هغه تلپاتې او دافغانانو عزت او هویت پکې وساتل شي.
دایې هم وویل چې دوږي نهمه له پښتنو او بلوڅو سره دپیوستون ورځ دې په راتلونکې کې تر دې هم په شاندارو مراسمو ولمانځل شي.
په ټوله کې ویناوالو او ګډونوالو د پښتنو او بلوڅو څخه ملاتړڅرګند کړ
لمانځغونډه د ملي یووالي د لاپیاوړتیا او د هېواد د سمسورتیا په دعا پای ته ورسېده.
