د کندهار په معروف او سرپل په البدر ولسوالي کې له عامو خلکو او سيمه ييزو مسؤلينو سره غونډې
يکشنبه ۲۳ ربيع الأول ۱۴۴۸
د سرحدونو، قومونو او قبايلو چارو وزارت لخوا د ولسواليو په کچه د اسلامي نظام تر چتر لاندي د شریعت د نفاذ او همغږۍ ترعنوان لاندې د روانو غونډو په ترڅ کې تېره ورځ د کندهار ولايت په معروف او سرپل په البدر ولسوالي کې د ولسوالۍ له استازو، سيمه ييزو مشرانو او عامو خلکو سره پراخې ولسي غونډې ترسره شوې.
دغو جوړو شويو غونډو ته د اسلامي امارت منسوبينو په خپلو ويناوو کې د مشرانو په اطاعت، يووالي او اتفاق ټينګار وکړ او همداراز د اسلامي نظام او ولسي همغږۍ پر ارزښت يې ګډونوال وپوهول. دوی همداشان د امير المؤمنين حفظه الله تعالی فرامين او هدايات د ټولنې داصلاح، د ناوړه رواجونو او ناسمو دودونو د مخنوي لپاره خورا مهم وبلل او روښانه يې کړه، چې د يادو فرمانونو عملي کول او خپرول د ټولو خلکو ګډ مسؤليت دی.
قومي مشرانو په خپل وار تېرو قربانيو او زحمتونو ته په اشارې سره وويل: د اسلامي نظام د قيام لپاره مو ډيرې قربانۍ ورکړې دي له مجاهدينو سره په هر حالت همکار پاتي شوي يو او که اړتيا شوه بيا هم د خپلو مالونو او سرونو په بدله هرې قربانۍ ته تيار يو. يادو مشرانو د خپلو سيمه ييزو ستونزو په شريکولو سره د اسلامي امارت له مشرانو وغوښتل، چې په ياده برخه کې دې د پام وړ اقدامات ترسره کړي
