خوست ولايت کې د ۱۸ کلنې دوښمني ترڅنګ يو بله مرګونې شخړه هم پايته ورسېده
پنج شنبه ۲ رمضان المبارک ۱۴۴۷ د خوست ولايت د سرحدونو، قومونو او قبايلو چارو ریاست د مسولینو، قومي مخور، دیني علماوو او مصلحینو په هڅو په خوست ولايت کې هغه شخړه هواره شوه چې د تیرو ۱۸ کلونو په موده کې یې دواړو کورنیو ته د مالي زیانونو تر څنګ ځاني زیانونه هم رسولي وه. جرګه کوونکو د دغې دښمني د پای ته رسېدو په موخه لومړی دواړه کورنۍ دې ته وهڅولې، ترڅو خپل اختلافات پایته ورسوي او د دوستۍ لار خپله کړي . وروسته له هغې، دوی يې د دواړو خواوو اختیارات واخیستل او پریکړي یې صادرې کړې، چې په پایله کې ياده دوښمني په دوستي بدله شوه او جګړه کوونکو کورنيو يو بل ته غاړه وکړه او سر پخلا شول. بلخوا د یاد ولایت باک ولسوالی کې هغه مرګونې شخړه چې د څلور قومونو ترمنځ پیښه شوې وه، او ۱۰ کاله یې دوام کړی وو، له امله یې ۷ کسان په قتل رسېدلي وو، د سرحدو، قومونو او قبايلو چارو ریاست د استازو، ځايي خلکو او علماوو په منځګړيتوب حل فصل شوه. د یادې شخړې د حل کیدو په مراسمو کې مسولينو په هغو قومونو چې په خپلو منځونو کې دښمنۍ لري غږ وکړ چې له بدیو دې لاس په سر شي او د مینې او یووالي ډک ژوند ته مخه کړي. په پایله کې څلور واړه قومونه د منځګړو خبرې و منلې او خوښې یې څرګنده کړه، چې د دوی ترمنځ دا اوږد مهاله شخړه د سرحدونو، قومونو او قبیلو چارو ریاست د مسولینو او جرګوونکو له لوري په پوره غور او هر اړخیز مصلحت حل شوه.
