د زابل په شاجوی ولسوالي کې یوه لويه شخړې حل شوه
دو شنبه ۲۲/۳/۱۴۴۶
د زابل ولایت په شاجوی ولسوالۍ کې د سلیمانخیل او توخي قوم ترمنځ څه موده وړاندې د یوې حقوقې مسئلې پر سر پېښه شوې شخړه چې د دواړو قومونو ترمنځ یې سخت غبرګونونه او ژورې ستونزې را منځته کړې وې، د سرحدونو، قومونو او قبایلو چارو د وزیر الحاج ملا نورالله نوري په هدایت د لېږل شوي پلاوي چې د وزارت حقوقي سلاکار معاون کجیرخان، د مقام د دفتر رئیس مولوي نیازمحمد تقي، دعوت او ارشاد رئیس مفتي شفیع الله ثاقب او د زابل ولایت مقام، د شاجوی د ولسوال خالد اخندزاده او سیمه ییز مسؤلینو په نه ستړي کېدونکو هلوځلو حل شوه.
په دغه شخړه کې ښکېلې خواوې د شاجوی ولسوالۍ د کلاخېلو او د ارغنداب ولسوالۍ د عراقي کلي دوې کورنۍ وې، چې تر منځ یې ستونزه د یوې مېرمنې د نکاح عقد پر سر رامنځته شوې وه، چې د دواړو لوریو ترمنځ یې ژورې ستونزې جوړې کړې وې، د وزارت له لوري د لېږل شوي هیئت، سیمه ییزو علماوو، متنفیذینو او د ولسوالۍ د مسؤلینو په ګډوهڅو یې روغې جوړې ته غاړه کېښوده. دوی د یوې مرکې په ترڅ کې مصلحینو ته اختیار لیکونه ورکړل ترڅو د دوی تر منځ ستونزې حل او په اړه یې د خیر پرېکړه وکړي.
مرکچیانو د طرفینو تر منځ فیصله وکړه او دواړه لوري په دې پرېکړه راضي شول او ژمنه یې وکړه چې نور به یو بل ته خنډونه نه جوړوي او په ارامه فضاء کې به خپل ژوند ته ادامه ورکوي.
