په میدان وردګو ولایت کې د اسلامي نظام د ثبات، ولسي یووالي او انسجام ستره ولسي غونډه جوړه شوه
یکشنبه ـ ۷/۱/۱۴۴۶
ولسي وګړو په میدان وردګو ولایت کې د اسلامي نظام د ثبات، ولسي یووالي او انسجام غونډې پر مهال د ا.ا.ا د مقتدر سیاست ستاینه وکړه، د نظام پایښت، یو موټی والی او ملي استحکام یې د پام وړ وباله. دوی د رسنیو پوچ تبلیغات د دې نظام د دُښمنانو وروستۍ حربه وبلله او زیاته یې کړه چې دوی د هیواد روڼ انځور ښه ویني. په غونډه کې د سرحدونو، قومونو او قبایلو وزارت د جرګو او قبایلو چارو د همغږۍ مرستیال مولوي محمد علي جان احمد یاد وزارت د ولسي ستونزو د اورېدلو ادرس یاد کړ ویې ویل: د هر مشر پلان همدا وي چې څنګه د خپل ولس ستونزې حل کړي، څنګه خپل ولس خودکفاء کړي، لکه څنګه مو چې مخکې د اسلامي نظام قیام او د اشغال خاتمه هدف و، نن مو د دې نظام ساتل او د هېوادوالو ستونزې اورېدل هدف دی. ښاغلي احمد د افغانانو اسلامي عقیده او سرښندنې وستایلې او زیاته یې کړه: دې ولس موږ ته شل کاله ډوډۍ راکړې، اکمال کړي یې یو او په سر او مال راسره درېدلي دي، موږ د دوی د مرستې په برکت غربیان مات کړل او خپلواکي مو ترلاسه کړه. د جلسې په اوږدو کې د قومونو په استازیتوب څو تنو د سرتاسري امن، اتحاد او همغږۍ په برخه کې د نظام هلې ځلې د پام وړ وبللې ویې ویل: په کوم نظام کې چې ولسونه متحد او یو موټی وي هغه نظام بقاء مومي، تېر پنځه څلوېښت کاله موږ همداسي اسلامي نظام غوښت چې یو مقتدر سیاست ولري او د ولس غږ واوري. دوی د قومونو ترمنځ انفصال او واټن له منځه تللی یاد کړ، د کرنې او مالدارۍ په برخه کې یې د پاملرنې غوښتنه وکړه. د جرګو او قبایلو چارو د همغږۍ رئیس شیخ حضرت ولي حقاني د اسلامي نظام د پایښت او اهمیت په اړه خبرو کې وویل: د دې نظام په قیام کې د هیواد هر بچي، هر سپین ږیري، هر کلي او هرې سیمې برخه اخیستې، دلته ککرۍ وشیندل شوې، وینې تویې شوې او دا نظام قائم شو. دا نظام چې په څومره لوی قیمت راغلی پایښت یې هم همدومره خواري او ستړیا غواړي چې زموږ او ستاسې ټولو دنده ده.
