د جرګو او قبایلو چارو د همغږۍ نوی ټاکل شوی مرستیال د وزارت کاروکوونکو ته ور وپېژندل شو
۲۴/۸/۱۴۴۵ هـ ق
د سرحدونو، قومونو او قبایلو چارو وزارت اړوند د جرګو او قبایلو چارو د همغږۍ نوی ټاکل شوی معین مولوي محمد علي جان احمد د وزارت په مقر کې د وزارت کارکوونکو ته د یوې غونډې پر مهال ور وپېژندل شو.
د دغې غونډې پر مهال د یاد وزارت سرپرست الحاج ملا نورالله نوري، د وزارت د سرحدي پلټنو معین مولوي محمد اسماعیل غزنوي، مسلکي معین مولوي احمد طه قادري، د وزارت ټولو مسؤلینو او کارکوونکو حضور درلود.
په پیل کې د بشري سرچینو رئیس مولوي کریم شاه تیلوي د ټاکل شوي مرستیال په اړه د امیر المؤمنین حفظه الله حکم ګډونوالو ته ور واوراوه، ورپسې سرپرست وزیر غونډې ته وینا وکړه او ویې ویل: الله تعالیﷻ اُمت محمدي مکلف ګرځولی، چې امانت خپل اهل ته وسپاري او د باطن اصلاح وکړي. ښاغلي نوري د نوي معرفي شوي معین په اړه خبرې وکړې زیاته یې کړه: چې نوموړي په تېر شل کلن انقلاب کې ډېرې قربانۍ ورکړې او د نظام خدمت یې کړی.
وروسته نوي ټاکل شوي مرستیال محمد علي جان احمد غونډې ته خبرې وکړې زیاته یې کړه: چې د تېر شل کلن انقلاب څخه مو هدف یوازي د الله ﷻ د دین اقامه وه، چې الله تعالی ﷻ خپل هدف ته ورسولو، اوس يې حفاظت هماغسې فرض دی لکه څنګه چې جهاد را باندې فرض و. ښاغلي احمد وویل: د افتخار ځای دا دی چې الله تعالی ﷻ په دغه سپېڅلي صف کې داخل کړي یو. هغه خپلې ټاکنې ته په اشارې سره وویل: د مشرتابه په ټاکنو کې یو حکمت وي، که دوی مې هر ځای په دنده ګماري، تر عسکري پوري هر مسؤلیت ته په ورین تندي تیار یم.
