د خوشحال خان عالي لېسې څخه لیدنه وشوه
۶/۲/۱۴۴۴
د خوشحال خان عالي لېسې څخه د سرحدونو، قومونو او قبایلو چارو وزارت مسلکي معین مولوي احمد طه قادري د یوه لوړ پوړې پلاوي په مشرۍ لیدنه وکړه. له دغې لیدنې څخه موخه په یاده لېسه کې د اوبو د جوړې شوې څاه افتتاح کول و.
په پیل کې د څاه له اوبو څخه د ګټې اخیستنې په موخه د افتتاح پټۍ د مسلکي معین، تللي پلاوي، د لیسې د مسؤلینو او استادانو له لوري غوڅه شوه او د خیر دعاء وشوه.
وروسته یاد پلاوي چې د دغه وزارت د پلان او پالیسۍ رئیس مولوي نیک محمد افغاني، د دعوت او ارشاد رئیس مفتي شفیع الله ثاقب، د ښوونې او روزنې رئیس مولوي عبدالرحمن رحماني او نور مسؤلین پکې شامل و، د یادې لیسې له مسجد څخه لیدنه وکړه او د ځینو برخو د ترمیم او جوړونې ژمنه یې وکړه.
