د غزني ولایت ناور ولسوالۍ له یو شمېر هزاره مشرانو سره لیدنه ترسره شوه
پنجشنبه د شعبان المعظم ۸/۱۴۴۴
د سرحدونو، قومونو او قبایلو چارو د دفتر رئیس شیخ حضرت ولي حقاني د غزني ولایت د ناور ولسوالۍ له یو شمېر هزاره مشرانو سره په خپل کاري دفتر کې وکتل. د دغې ناستې په پیل کې یادو مشرانو د غزني ولایت ناور ولسوالۍ د دوو قومونو تر منځ د ځمکو پر سر د شخړې په اړه اندېښنه څرګنده کړه او ویې ویل چې یاده شخړه د همدغې ولسوالۍ د پیرحسین خوات او د کوچیانو د احمدزیو قوم ترمنځ له څو کلونو را هیسي جریان لري چې له دواړو لورو څخه پکې درې تنه وژل شوي هم دي. دوی د یادې شخړې د حل او د دواړو لوریو ترمنځ د منځګړیتوب غوښتنه وکړه. د یادې کتنې په وروستیو کې د دفتر رئیس ښاغلي حقاني دوی ته ښه هرکلی وکړ او یاد وزارت یې د ټولو افغان قومونو خپل کور یاد کړ او زیاته یې کړه: موږ ستاسو له ستونزو خبر یو او دا موضوع مو د رئیس الوزراء له لوري د شخړو د هوارولو ټاکل شوي پلاوي ته لیږلې ده، زه ډاډ درکوم چې په نږدې وخت کې به ستاسو ترمنځ د ټاکل شوي پلاوي له لوري روغه جوړه وشي.
