د ولسمشر د لارښوونو سره سم د جینیوا کنفرانس د ژمنو د تطبیق په اړه کمېټه جوړه شوه!

mobta-af
Mon, Jan 11 2021 2:39 PM
mobta

د جینیوا د ۲۰۲۰ کنفرانس د ژمنو د تطبیق په موخه کمېټه، چې د سرحدونو او قبایلو چارو وزیر ښاغلي محب الله صمیم د ۲۱/۱۰/۱۳۹۹ نېټې او ۱۰۸۵ ګڼه حکم پر اساس د وزارت د مسلکي معین ښاغلي ډاکټر فریدون بارکزي په مشرۍ او د داخلي تفتیش، مالي اداري، ښوونې او روزنې او د پلان او پالیسۍ رئيسانو په ګډون جوړه شوې ده، نن یې په مسلکي معینیت کې غونډه وکړه.

په دې غونډه کې چی نن جوړه شوه د افغان ولسمشر د لارښوونو په رڼا کې د دولت له خوا د ژمنو د عملي کېدو په اړه د غونډې برخه والو نظریات راټول شول او په دې اړه لازمې پرېکړې وشوې.

د یادونې وړه ده، چې د کمېټې لپاره سکرتریت جوړ شو، چې په میاشت کې به یو ځل غونډه کوي او په دې اړه به په ګډه سره لازم تصمیمونه نیسي.

د کمېټې د جوړېدو څخه اساسي موخه د فساد پر وړاندې مبارزه او د شفافیت رامنځته کول دي.