د ښوونکي د نړیوالې ورځې لمانځنه!
په هغه غونډه کې، چې نن یکشنبې د ۱۳۹۹ لمریز کال د تلې میاشتې پر ۱۳ مه نېټه د وزارت په تالار کې د ښځو د ملاتړ واحد آمریت له خوا د ښوونکو د نړیوالې ورځې د لمانځلو په موخه جوړه شوې وه، د سرحدونو او قبایلو چارو سرپرست او نوماند وزیر ښاغلي محب الله صمیم، معین صاحبانو، رئيسانو، د رسنیو استازو او د وزارت کارکوونکو پکې ګډون درلود.
د غونډه په پیل کې کې د قرانکریم څو مبارک ایتونه تلاوت او ملي سرود خپور شو.
ورپسې د وړکتون امرې آغلې مریم نبي زاده د غونډې ګډونوالو ته ښه راغلاست وویل او اجنډا یې شریکه کړه.
ورپسې د سرحدونو او قبایلو چارو سرپرست او نوماند وزیر ښاغلي محب لله صمیم په خپلو خبرو کې د ښوونکي نړیوالې ورځې په مناسبت مبارکي وویله او د ښوونکي د ارزښت په اړه یې معلومات وړاندې کړل وې ویل: د ښوونکي مقام ډېر لوړ دی او دا په څو ټکو خبرو بسنه نه کوي دا د ویاړ ځای ده، چې نن ډېر ستر شخصیتونه او علمي کادرونه شتون لري همدا د ښوونکو د هلو ځلو پایله ده، چې داسې شخصیتونه یې روزلي او ټولنې ته یې د خدمت لپاره وړاندې کړي دي، ځکه ښوونکی لکه شمعه ځان سوزي او نورو ته رڼا ورکوي.
همدا راز ښاغلي محب الله صمیم زیاته کړه بیا هم د دوموره خدمتونو سربېره دوی ته ډېر کم امیتازات ورکول کیږي، چې د ژوندانه اړتیاوو لپاره یې بسنه نه کوي غوښتنه مو داده، چې د ښوونکو اقتصادي برخې ته پاملرنه وشي، دوی ته د ژوندانه اسانتیاوې برابرې شي او ارزښت او مقام ته یې درناوي وشي، انشاالله موږ به د خپلو شته امکاناتو څخه په ګټې اخیستنې سره د وزارت د اړوند لېسو ښوونکو لپاره لازمې اسانتیاوې برابري کړو.
وروسته د جرګو او قبایلو چارو د همغږۍ معین ښاغلي محمد یعقوب احمدزي خبرې وکړې او د ښوونکي په مقام او ارزښت یې رڼا واچوله وې ویل: چې د ښوونکي د لمانځلو ورځ یوه ورځ نه ده، بلکې هره ورځ د ښوونکي د قدر او عزت ورځ ده له زده کوونکو مو هیله داده، چې د خپلو ښوونکو په ارزښت پوه او درناوي ورته وکړي.
د دې نړیوالې ورځې په مناسبت په دې جوړه شوې غونډه کې د وزارت د وړکتون ماشومانو ملي ترانې وړاندې کړې.
په پای کې د وزارت له خوا هغه ستاینلیکونو او ډالۍ چې د دې ارزښتناکې ورځې په مناسبت برابرې شوې وې ښوونکو او د وزارت ښځینه کارکوونکو ته ورکړل شوې.
