وزارت ژمن دی، چې اطلاعاتو ته د لاسرسۍ له قانون سره سم خلکوته پر وخت او کره معلومات ورکړي!
دغه خبره د سرحدونو او قبایلو چارو وزارت مسلکي معین ښاغلي ډاکټر فریدون بارکزي نن شنبې د روان لمریز کال د کب میاشتې پر ۱۰ مه نېټه اطلاعاتو د لاسرسۍ د کمیسېون له نظارتي استازو هر یو ښاغلي محمد داوود فیاض او اغلې بشینه خراساني سره په کتنه کې څرګنده کړه.
په دې کتنه کې چې، د وزارت مالي او اداري معین ښاغلی شجاع الملک جلاله خان، د اطلاعاتو او عامه اړیکو ریس عبدالوحید خاورې ، د وزارت د اطلاع رسوونې مسوول ښاغلی سید نظیم سعیدي او د ویب سایټ مدیره هم حاضره وه.
لومړۍ د اطلاعاتو د لاسرسي قانون نظارتي استازي په خپلو خبرو کې د وزارت له اطلاعاتي او فرهنګي کړنو څخه، چې پروخت د فېسبوک، ویب پاڼې، مجلو، جرېدو او نور رسنیو له لارې خپریږي رضایت وښود او د ویب سایټ او خلکو ته د اطلاعاتو د ورکړې په اړه یې خپل یو لړ وړاندیزونه له ښاغلي مسلکي معین سره شریک کړل.
ورپسې ښاغلي بارکزي اطلاعاتو ته لاسرسۍ د افغانستان د خلکو حق وباله زیاته يې کړه، چې وزارت ژمن دې چې د تېر په شان به خلکو ته پروخت او کره معلومات وړاندې کوي.
ښاغلی مسلکي معین همدا راز د اطلاعاتو او عامه اړیکو رئیس ته لارښوونه وکړه، د لا زیات شفافیت په خاطر د ویب سايټ په بډاینه او فعالیتونو په منعکسولو کې لا زیاتې هلې ځلې وکړي.
د یادونې وړ ده، چې له کتنې مخکې د وزارت ویب پاڼه د هغو ۴۴ شاخصونو سره سم چې کميسېون ټاکلي دي، د کميسیون د استازو له خوا نظارت او ارزیابي شوه، چې له نیکه مرغه د استازو رضایت یې له ځانه سره درلود.
