باميان ولايت کې د سيمه ييزو خلکو او کوچيانو د ۲۳۰ کورنيو ترمنځ د شخړې حل
يکشنبه ۲۸ ذوالحجة الحرام ۱۴۴۷
د باميان ولایت د سرحدونو، قومونو او قبایلو چارو آمر حافظ محب الله سجاد د شبر ولسوالي په سیمه کې د کوچیانو او ځایي اوسېدونکو د ۲۳۰ کورنيو ترمنځ د ځړځايونو پر سر رامنځته شوې شخړه د ولسوالۍ د مسئولینو، قومي مشرانو او مخورو په همغږۍ حل او فصل کړه او يادو اختلافاتو ته یې د پای ټکی کېښود.
د باميان ولایت د سرحدونو، قومونو او قبایلو چارو آمريت مسؤلينو د خپلو خبرو پرمهال دواړه لوري زغم، حوصلې، ورورولۍ او د ښه ګاونډیتوب اصولو ته راوبلل او د مسلمانانو یووالی يې د سولې او ثبات د ټینګښت تر ټولو غوره لار وبلله.
په پای کې د جرګې غړو د قضیې د بېلابېلو اړخونو په پام کې نیولو او د دواړو لوريو د نظریاتو او غوښتنو تر اورېدو وروسته د هغوی په خوښه او رضایت پرېکړه وکړه، چې د دواړو خواوو له لوري ومنل شوه، موجوده اختلافات پای ته ورسېدل او د یووالي او ورورولي فضا رامنځته شوه.
