ارزګان کې ۱۳ کلنه او بلخ کې يو کلنه شخړه هواره شوه
يکشنبه ۲۸ ربیعالاول ۱۴۴۷
په ارزګان ولايت کې د دوو کورنيو ترمنځ د مېرمنو پر سر راپورته شوې ۱۳ کلنه شخړه، چې دواړو غاړو ته يې ګڼې کورنۍ ستونزې را ولاړې کړې وې، د مسؤلينو په منځګړيتوب حل شوه او ښکېلو طرفونو له خپل منځي اختلافاتو لاس واخېست.
د ياد ولايت د سرحدونو، قومونو او قبايلو چارو آمر په مشري د قومي مشرانو اوعلماوو په هڅو د څو ناستو په ترڅ کې د دغې کورنۍ ستونزې عوامل وپلټل شول، واکونه ترې واخېستل شول او ترمنځ يې د يوې عادلاته پرېکړې په اساس فيصله وشوه، چې د ټولو د خوښي لامل وګرځېده او دغه ۱۳ کلنه شخړه يې پای ته ورسوله.
همداراز د بلخ ولايت په مزارشريف ښار کې هم د څو کورنيو ترمنځ د خپل منځي تاوتريخوالي له کبله راپورته شوې يو کلنه شخړه، د دغه ولايت د سرحدونو، قومونو او قبايلو چارو رياست استازو له لوري په داسې شکل هواره شوه، چې مرورو کورنيو يو بل وبښل او د پخلاينې لاسونه يې سره ورکړل.
