په سرپل کې د ۴ کلنې شخړې سربېره غزني، بلخ او کندز کې هم شخړې هوارې شوې
يکشنبه ۲۱ ربیعالاول ۱۴۴۷ د سرپل ولايت د سرحدونو، قومونو او قبایلو چارو ریاست مسؤلینو په هڅو او د سیمه ییزو مشرانو، علماوو او متنفذینو په همکاري.د یاد ولایت په سيد آباد ولسوالي کې د دوو کورنيو ترمنځ څلور کلنه شخړه، چې اوږدې بد بيني يې راولاړې کړې وې حل او دواړو خواوو د دوستي لاسونه سره ورکړل.د دې ترڅنګ د غزني ګيلان ولسوالي په آغوجان سيمه کې د دوو کورنيو ترمنځ لومړی لفظي شخړه راپورته شوې، وروسته په فزيکي اخ ډب اوښتې، چې له کبله يې يو کس خپل ژوند بايللی.د دغې شخړې د هواري په موخه د ياد ولايت د سرحدونو، قومونو او قبايلو چارو رياست په مشري يوې ګډې جرګې د روغې جوړې فيصله وکړه او ښکېل اړخونه يې سره غاړه غړۍ کړل.همداراز د بلخ ولايت دولت آباد ولسوالي په قرشيګک سيمه کې د ميراث پر سر څو جلا شوې کورنۍ وروسته له دوو کلونو د دغه ولايت د سرحدونو، قومونو او قبايلو چارو رياست د مسؤلينو له لوري پخلا او د ورورولي ژوند ته يې مخه کړه.په ورته مهال د کندز ولایت په امام صيب ولسوالي کې هم د خپلمنځي جنجالونو له امله را پورته شوې شخړه، چې له کبله يې يو کس وژل شوی و، د دغه ولايت د سرحدونو، قومونو او قبایلو چارو رياست مسؤلينو لخوا حل او ښکېلو خواوو يو بل ته بښنه وکړه.
