د هېواد د ۲۶ ولایتونو له یو شمېر بلوڅ قومي مشرانو سره کتنه
شنبه ۲۴ ذوالقعده الحرام ۱۴۴۵
د سرحدونو، قومونو او قبایلو چارو سرپرست وزیر الحاج ملانورالله نوري په داسې حال کې چې د وزارت د اطلاعاتو او عامه اړیکو رئیس مفتي تسلیم الله حقاني هم حضور درلود د هېواد د ۲۶ ولایتونو د بلوڅ قوم له یو شمېر قومي مشرانو ، دیني عالمانو، مخورو او ځوانانو سره د وزارت د کنفرانسونو په تالار کې و کتل. په دې کتنه کې راغلو مشرانو په خپلو خبرو کې د اسلامي نظام په شتون خوښي څرګنده کړه ویې ویل چې یاد نظام له هر ډول تبعیض پرته د ټولو قومونو پر وړاندې دروازې پرانیستې دي او نن د بلوڅو په شمول ټول افغانان کولای شي د ا.ا.ا مشرانو ته خپلې غوښتنې ورسوي. نوموړیو همداراز د هېواد په بېلابېلو سیمو کې مېشتو بلوڅانو ته د روغتیایي مرکزونو د جوړولو، د وزارت په اړوند تعلیمي مرکزونو کې د ځوانانو د جذب، د دوی په سیمو کې د خیریه مؤسساتو د فعالیت، د بلوڅي ژبې د بډاینې او د ا.ا.ا په جوړښت کې د ځوانانو د ګمارنې په اړه یو لړ ستونزې او غوښتنې د حل په موخه شریکې کړې او دغه راز يې زیاته کړه چې بلوڅ ځوانان د اسلامي نظام هر ډول خدمت ته چمتو دي. ورپسې سرپرست وزير ښاغلي نوري په خپلو خبرو کې وویل چې بلوڅ قومونو د تېر شل کلن جهاد په اوږدو کې د اشغالګرو پر وړاندې د خاورې د دفاع په خاطر ډېرې قربانۍ ورکړې دي چې اسلامي امارت ورته د قدر په سترګه ګوري او د دوی په سیمو کې به د نورو ولایتونو په څېر په هره برخه کې لازمې کړنې تر سره کړي تر څو وکولای شي د یاد قوم ټولو ستونزو ته پر وخت رسیدګي وکړي.
