په زابل ولایت کې د مېشتو کوچیانو ستونزو ته رسېدنه کېږي

۱۴۴۵/۴/۱۱

د سرحدونو، قومونو او قبایلو چارو وزارت د کوچیانو چارو د سمون لوی رئیس الحاج مولوی ګل زرین کوچي او ورسره مل پلاوي زابل ولایت ته د خپل کاري سفر په ترڅ کې یوه لویه ولسي غونډه جوړه کړه چې د کوچي قشر ديني عالمانو، قومي مشرانو، ځوانانو او د یو شمېر ادارو مسؤلینو پکې ګډون کړی وو.

په غونډه کې د کوچیانو قومي مخورو، سرخيلو او علماوو خپلې غوښتنې او ستونزې شریکې کړې او د وچکاليو له امله د څړځايونو د وچېدو، د ديني مدرسو، ښوونځيو او کلينکونو د نشتون په برخه کې د شته ستونزو د حل او اسانتياوو رامنځته کولو غوښتنه یې وکړه. 

غونډې ته د خبرو پر مهال ښاغلي کوچي وویل: اسلامي امارت د افغانستان د ټولو قومونو او قشرونو د ستونزو حل ته ژمن دی او ستاسې ستونزو ته رسېدنه زموږ مسؤلیت دی. 
نوموړي د کوچیانو ونډه د هیواد په اقتصاد کې مهمه یاده کړه او له راغلیو کوچي مشرانو څخه یې وغوښتل تر څو په اخوت او ورورګلوی یو له بل سره ژوند وکړي. 
ښاغلي کوچي همدارنګه زیاته کړه چې ټول مسؤلین د دې ولس خادمان دي او دروازې یې ستاسې پر مخ هر وخت پرانیستې دي.