د زابل ولايت له ځينو علماوو سره ملاقات
۱۴۴۴/۲/۷ شنبه
د سرحدونو، قومونو او قبايلو چارو سرپرست وزير الحاج ملا نورالله (نوري) زابل ولايت ته د سفر پر مهال د بيلابيلو ناستو په ترڅ کې له علماوو سره کتلي. ښاغلي نوري چي د وزارت د دعوت او ارشاد رئيس الحاج مولوي شفيع الله (ثاقب) او د مالي او اداري عموموي رئيس ملا محمدانور (تائب) يې هم ملتيا کوله د سنبلې نهمه د امريکايي اشغال څخه د ازادي په مناسبت د زابل مرکز کلات کې جوړه شوې ستره غونډه کې ګډون وکړ. غونډې ته په وينا کې يې د افغانستان ميړني او مجاهد ولس ته ددې بريا د مبارکۍ تر څنګ زياته کړه چي د افغانستان اسلامي امارت به د هيواد له خاورې څخه په کلکه دفاع کوي او هيچا ته اجازه نه ورکوي چې زموږ پر خاوره تيری وکړي. ښاغلی نوري له غونډې وروسته د اميرالمؤمنين ملا محمد عمر مجاهد رحمه الله د ژوند وروستي هستوګنځای ته ورغی او ددې ستر رهبر او مجاهد روح ته يې دعا وکړه. دغه راز الحاج ملا نورالله (نوري) د بيلابيلو ناستو په ترڅ کې د زابل ولايت له علماوو او شيوخو کرامو سره وکتل. د شيخ عبيدالرحمن اخندزاده صاحب، حاجي اغا صاحب مرحوم او د شاه جوی ولسوالۍ شاه حسين خيلو اخندزاده صاحب له ديني مدرسو څخه ليدنه تر سره کړه او له مدرسو سره يې مالي همکاري هم وکړه.
