په کابل کې د شهید عثمان کاکړ د جنازې غايبانه لمونځ ادا شو!
د پیاوړي ملتپاله مبارز او نوموتي سیاستوال ارواښاد عثمان کاکړ د جنازې لمونځ نن چهارشنبه د روان لمریز کال د چنګاښ په ۳مه نېټه د کابل په عید ګاه جومات کې ادا شو.
په یادو مراسمو کې د سرحدونو او قبایلو چارو د وزیر ښاغلي محب الله صمیم په ګډون ګڼو لوړ پوړو دولتي چارواکو، مدني فعالانو، قومي مشرانو او د ارواښاد مینه والو او خواخوږ برخه اخیستې وه.
ښاغلي صمیم د جنازې لمونځ له ادا کولو وروسته وویل: ارواښاد کاکړ د لوى او تاریخي افغانستان د وګړو د حقوقو د ترلاسه کولو لپاره نه ستړې کیدونکې مبارزه وکړه، تل د مظلومانو ترڅنګ ولاړ و ، د ظلم پر خلاف خاموشه نه پاتې کېده، او هیچا ته یې اجازه نه ورکوله چې پښتانه له خپلو اساسي حقوقو څخه بې برخې کړي.
د سرحدونو او قبایلو چارو وزیر د خپلو خبرو په دوام وویل: لر او بر افغانان باید په ګډه په لوی افغانستان کې سولې او امن د ټینګښت لپاره کار وکړي، ځکه غم او ښادي مو سره يوه ده، بايد مشترک دښمن ته اجازه ورنه کړو، ترڅو خپلې کرغېړنې موخې تعقیب کړي.
په پاي کې د مراسمو ټولو ګډونوالو د ارواښاد عثمان کاکړ پاک روح ته دعا وکړه او د هغه نشتوالی یې د ټولو افغانانو لپاره نه جبرانېدونکې ضایعه وبلله.
د یادونې وړ ده، چې په ننګرهار، خوست او کندهار کې هم ولسونو د شهید عثمان کاکړ د جنازې غایبانه لمونځونه ادا کړل.
