د ۱۴۰۰ هجري لمریز کال او لرغونی نوروز دې ټولو درنو هېوادوالو ته مبارک وي!
د ۱۴۰۰ لمریز کال د رارسېدو په مناسبت ټولو درنو هېوادوالو، زړورو افغان امنیتي او دفاعي ځواکونو، خویندو او وروڼو ته د زړه له کومې مبارکي وایم.
د لوی خدای ج په سپېڅلي دربار کې د دعا لاسونه لپه کوو چې نوی کال مو په ګران هېواد کې د سولې، ملي یووالي او خوښیو کال وي، هغه کورنۍ چې خپل غړي یې د هېواد د عزت او لوړو ملي ګټو ساتنې او پالنې په پار د افغان امنیتي او دفاعي ځواکونو په لیکو کې له لاسه ورکړي د تسلیت او همدردۍ مراتب وړاندې کوم،.
یو ځل بیا په مخالفینو غږ کوو چې نور دې افغانان نه شهیدانوي تلپاتې اوربند ته دې غاړه کېږدي تر څو یوې باعزته سولې ته لاره هواره شي له اوربند پرته موږ نشو کولای چې با عزته سولې ته ورسېږو.
دغه راز په قومي مشرانو، دیني عالمانو او مخورو غږ کووو، چې خلکو ته په خپلو سیمو کې عامه پوهاوی ورکړي تر څو کورنۍ خپل بچیان د علم او پوهې د تر لاسه کولو لپاره ښوونځیو ته واستوي تر څو زموږ د ګران هېواد راتلونکی ورسره روښانه شي.
محب الله صمیم
د سرحدونو او قبایلو چارو وزیر
