د میدان وردګ او بامیان ولایتونو د شخړو د حل کمیسیون له استازو سره ناسته
پنجشنبه ـ ۱۲/۱/۱۴۴۶
د میدان وردګ او بامیان ولایتونو ترمنځ د څړځایونو او لویو لارو پر سر د اختلافاتو د حل په موخه د سرحدونو، قومونو او قبایلو چارو وزارت له لوري د جوړو شویو کمیسیونونو استازو له سرپرست وزیر الحاج ملانورالله نوري سره په خپل کاري دفتر کې وکتل. د دغې کتنې پر مهال د کمسیونونو استازو د یادو ولایتونو د ځایي خلکو او عبوري کوچیانو ترمنځ د ځمکو او مالڅړونو د موضوع په اړه هراړخیز معلومات وړاندې کړل او د خپلو ترسره شویو کړنو راپور یې ارایه کړ. دوی په دغه برخه خپل ترسره شوي خدمتونه یاد کړل او د ځينو ستونزو د حل غوښتنه یې وکړه. د سرحدونو، قومونو او قبایلو چارو وزیر ښاغلي نوري د دواړو ولایتونو د کمیسیونونو له ستړیاوو کور ودانی وکړ، زیاته یې کړه چې په یاده موضوع کې به له ولایتي مسؤلینو سره همغږي وکړي او د شته ستونزو د حل په برخه کې به د ولایتي مسؤلینو همکاري وغواړي. هېره دي نه وي چې د ناستې پر مهال د وزارت د کوچیانو چارو د سمون لوی رئیس مولوي ګل زرین کوچي هم ګډون کړی و.
