بامیانو کې د اسلامي نظام ثبات، د ولسونو د یووالي او انسجام غونډه کې د خلکو ستونزې واورېدل شوې
چهارشنبه ۱۴۴۶/۵/۱۱
په بامیانو کې د اسلامي نظام ثبات، د ولسونو د یووالي او انسجام غونډه تېره ورځ په داسې حال کې تر سره شوه، چې د ریاست الوزرا سیاسي مرستیال الحاج مولوي عبدالکبیر اخند او د سرحدنو، قومونو او قبایلو چارو وزارت د جرګو او قبایلو چارو د همغږۍ معین الحاج مولوي محمد علي جان احمد او د یاد ولایت بیلابېلو نظامي او ملکي مسؤلینو ،رئیسانو، علماوو، ځوانانو او زرګونه ولسي وګړو پکې ګډون کړی وو.
د غونډې پر مهال د ریاست الوزراء سیاسي مرستیال ښاغلي عبدالکبیر وویل: دا نظام د دې ملت له منځه را پورته شوی او د زرګونه شهیدانو د قربانیو په پایله کې حاکم شوی دی چې له کبله یې زرګونه کونډې، یتیمان او بې سرپرستان را پاته دي. هغه زیاته کړه: موږ او تاسې باید په ګډه هڅه وکړو چې د خپل نظام حفاظت او ساتنه وکړو ترڅو د سرونو په قربانیو ګټل شوی اسلامي نظام د همېش لپاره په دې خاوره مستحکم پاته شي. ښاغلي عبدالکبیر له نړیوالو سره د ښه تعامل یادونه وکړه او ولسونو ته یې د ډاډ ورکړ چې اسلامي امارت له شاوخوا ۴۰ هیوادونو سره مثبت تعامل او نیکې اړیکې لري.
ورپسې د یاد وزارت د جرګو او قبایلو چارو د همغږۍ مرستيال مولوي محمد علي جان احمد د ملي يووالي پر ټينګښت، د قومونو ترمنځ د لا زیاتې همغږۍ، نږدېوالي او ورورګلوۍ ټینګار وکړ، ویې ویل: نن د هغو شهیدانو ارمانونه پوره شول، چي د محمدي بیرغ او اعلاء کلمة الله لپاره یې ځانونه د سرو سکروټو مخته ور ګذارول او په تش لاس یې د کُفري ځواکونو مقابله کوله.
د غونډې په اوږدو کې د کرنې او مالدارۍ وزیر مولوي عطاء الله عمري او د بامیان والي مولوي عبدالله سرحدي سربېره ولسي وګړو هم خبرې وکړې د اسلامي نظام د پر ثبات او ولسي همغږي یې ټینګار وکړ زیاته یې چې د کرنې وزارت د هیواد د کرنیز سیستم د عصري کولو، کرنیزو محصولاتو ته د بازار موندنې او سړخونو د جوړولو په برخه کې پوره کوښښ کوي او ژر ده چې د افغانستان به د کرنیز سکتور په برخه کې خودکفایي ته ورسېږي. ولسي وګړو باميان د علم او فرهنګ کور وباله او د برېښنا، سړک جوړونې او ځوانانو ته د کاري فرصتونو د ایجادولو په برخه کې د پاملرنې غوښتنه وکړه.
