پکتيا کې د څه باندې دوه لسيزو په دوام يوې خونړۍ شخړې پای وموند
پنجشنبه ۲۹ جمادی الأولی ۱۴۴۷
د ياد ولايت د سرحدونو، قومونو او قبايلو چارو رياست مسؤلينو د ولايت مقام د استازو، قومي مشرانو او علماوو په همکاري د دغه ولايت د ځاځي اريوب ولسوالي په غوږوزې سيمه کې د دوو کورنيو ترمنځ د شاوخوا پنځه وېشت کالو په دوام هغه شخړه حل کړه، چې دواړو لوريو ته يې درنه مرګ ژوبله اړولې وه.
د دغې رامنځته شوې شخړې په نتيجه کې له دواړو خواوو شپږ تنه وژل شوي، څو تنه ټپيان شوي او د ګڼو مالي تاوانونو ترڅنګ يې د دښمني اور لاهم بل و، چې مسؤلينو د خپلو دوامداره هلو ځلو په پايله کې لومړی روغې جوړې ته آمده کړل او بيا يې ياده د کلونو کلونو دښمني په دوستي وربدله کړه.
د ښکېلو کورنيو مشرانو په خپله ترسره شوې روغه د خوښي ترڅنګ د جرګه کوونکو مشرانو له هڅو په مننې کولو سره يو بل وبښل او ژمنه يې وکړه، چې په راتلونکي کې به هېڅ ډول دښمني، تربګني او تاوترېخوالي ته زړه ښه نه کړي.
