د کندز په علياباد او تخار په بهارک ولسوالۍ کې جلا جلا ولسي غونډې تر سره شوې
یکشنبه، ۷ ربیعالأول ۱۴۴۷
د کندز ولایت په علياباد او تخار ولایت په بهارک ولسوالۍ کې د ولسي خلکو د ستونزو د اورېدو په موخه ځانګړې غونډې جوړې شوې، چې پر مهال یې د سیمې مخورو، علماوو او ځايي اوسېدونکو خپلې اړینې ستونزې او غوښتنې وړاندې کړې.
د اسلامي اخوت، ورورولۍ او ولسي یووالي پر بنسټ دغو جوړو شويو غونډو کې د سرحدونو، قومونو او قبیلو چارو وزارت اړوندو ریاستونو استازو خلکو ته ډاډ ورکړ، چې د دوی اورېدلې ستونزې به د قانوني لارو له مخې خپلو لوړ رتبه مشرانو ته ورسوي. یادو استازو همداراز د ولسي ستونزو هواری د اسلامي امارت یو بنسټیز اصل یاد کړ.
د دغو جوړو شويو غونډو له لارې د امیرالمؤمنین حفظهالله د وروستیو فرمانونو تشریح هم وشوه، چې د ناوړه دودونو، بېځایه لګښتونو او انساني قاچاق مخنیوي ټینګار پکې شوی دی. ګډونوالو د دغو فرمانونو هرکلی وکړ او د خلکو ترمنځ یې د یووالي او همکارۍ لپاره مهم وبلل.
