له قومي او قبایلي مشرانو سره لیدنه!
د سرحدونو او قبایلو چارو وزیر محترم محمد شفیق ګل اغا شېرزي نن په داسې حال کې چې د وزارت مسلکي مرستیال ښاغلی ډاکټر فریدون بارکزی، د جرګو او قبایلي چارو د همغږۍ معین ښاغلي محمد یعقوب احمدزی، مالي او اداري معین ښاغلي شجاع الملک جلاله هم حاضر وو، د هېواد له بېلابېلو قومي او قبایلي مشرانو سره د وزارت د کنفرانسونو په تالارکې وکتل.
په دې کتنه کې لومړی ښاغلي محمد شفیق ګل اغا شېرزي د ټاکنو کمېسیون له خوا د تلې د ۶مې نېټې د ټاکنو د لومړنیو پایلو د اعلان له امله خوښي څرګنده کړه، د ټاکنو د خپلواک کمیسیون له ټولو کارکوونکو، د هېواد له امنیتي او دفاعي ځواکونو، قومي او قبایلي مشرانو او د افغانستان د خلکو څخه مننه وکړه، چې په سختو امنیتي حالاتو کې یې د جمهوریت د بقا او د موکراسي د بنسټونو د پیاوړتیا او د خپل برخلیک په ټاکلو کې يې ونډه واخیسته.
ورپسې د هېواد بېلابېلو قومي او قبایلي مشرانو د خپلو خبرو په ترڅ کې د ټاکنو د کمېسیون له خوا ولسمشریزو ټاکنو د پایلو د اعلان هرکلی وکړ او هېواد وال یې اتحاد او اتفاق ته راوبلل.
نوموړو د خپلو خبرو په دوام وویل: افغانستان نن له هر بل وخت نه زیات ملي یووالي او سولې ته اړتیا لري، نو دا زموږ دنده ده، چې د سرحدونو او قبایلو چارو له محترم وزارت سره په ګډه د سولې او ملي یووالي لپاره ګډ کار وکړو ترڅو په هېواد کې د جګړې ټغر ټول او سوله ټينګه شي.
