په کابل کې د جاپان سفير ته د خواخوږۍ او ډاګېرنې مراتب وړاندې شول!
د سرحدونو او قبايلو چارو وزير محترم محمد شفيق ګل اغا شېر زي پرون په داسې حال کې چې د وزارت مسلکي مرستيال ښاغلى ډاکټر فريدون بارکزى هم ورسره ملګری و، د چاپان سفارت ته تشريف يوړ او د ډاکټر ناکامورا د مړينې له امله يې نوموړي ته د خپل ژور خپګان او تسليت مراتب څرګند کړل.
ښاغلي شېرزي له افغانانو سره په بېلابېلو برخو کې د ډاکټر ناکامورا خدمتونه بې سارې او نه هېرېدونکي وبلل او نوموړى يې اتل وباله.
ښاغلي شېرزي دغه راز په ننګرهار کې له نوموړي سره ګډ کار ته په اشارې سره وويل، چې افغانان به هېڅکله هم د هغه خدمتونه هېر نه کړي.
د سرحدونو او قبايلو چارو وزير ښاغلي محمد شفیق ګل آغا شېرزي په کابل کې د جاپان سفير ته هغه تصوير، چې د ستايلو او تشويق له امله يې ډاکټر ناکامورا په غېږ کې نيولى و، هم ډالۍ کړ.
په مقابل کې د جاپان سفير له محترم شېرزي او محترم بارکزي له خواخوږى او ډالى څخه مننه وکړه.
