په ولسواليو کې د ولسي یووالي او ستونزو د اورېدو غونډو دوام
سه شنبه ۶ جمادي الثاني ۱۴۴۷
د سرحدونو، قومونو او قبایلو چارو وزارت د پلان سره سم د هيواد په بېلابېلو ولایتونو کې له ولسي خلکو سره د ولسي یووالي او ستونزو د اوريدو په موخه غونډې ترسره شوې، چې پکې د باميان ولايت پنجاب ولسوالي، د کندز ولايت اقتاش ولسوالي، د کنړ ولايت څوکۍ ولسوالي او د بدخشان ولايت ۹ ولسواليو کوهستان، ياوان، ارغستان، خواهان، کوف آب، شيګي نُسي، مايمي او شُغنان ولسوالي موجودې وې.
د غونډو ګډونوالو د اسلامي نظام څخه د کلک ملاتړ ترڅنګ دا نظام د ولسونو د يووالي، همغږۍ او ستونزو هواري لپاره مهم وباله او ويې ويل: د اسلامي نظام هر مشر د ولس د خلکو پر وړاندې ځان خادم ګڼي او هېڅ د مشرولي احساس نه کوي نو همدا وجه ده، چې د ولسونو تر کورونو ورځي ستونزې يې اوري او د حل په لارو چارو يې کار کوي. دوی همدا راز ډاډ څرګند کړ، چې په هرصورت به د دې نظام ترڅنګ ولاړ وي.
په ولسواليو کې د دغه جوړو شويو غونډو پرمهال مسؤلینو د ولسي ملاتړ قدردانی وکړ او ويې ويل: د اسلامي امارت ټول مسؤلين شپه او ورځ د خپلو ولسونو د هوسايني او ارام ژوند لپاره هڅې کوي. دوی خلکو ته ډاډ ورکړ، چې هره لويه او وړه ستونزه به يې د لوړ رتبه مشرانو ره د حل په موخه شريکوي. يادو مسؤلينو د امیرالمؤمنین حفظه الله د بدو دودونو او رواجونو د مخنیوي فرمان هم تشریح کړ او د غونډې په ګډونوالو يې وويشه.
