خوست کې دوه کورنيو له ۳ کلن خپل منځي تاوتريخوالي لاس واخېست
سه شنبه ۲ ربيع الأول ۱۴۴۷
د دغه ولايت د سرحدونو، قومونو او قبايلو چارو رياست مسؤلينو په مشري د ولایتي ادارې استازو، قومي مشرانو او ديني عالمانو په هڅو د ياد ولايت د صبریو او یعقوبیو ولسوالۍ اړوند زمبر سیمه کې د دوو کورنیو ترمنځ شاوخوا ٣ کلنه خپلمنځي شخړه هواره کړه او دواړو لوريو د ورورولي لاسونه سره ورکړل.
په دغه رامنځته شوې شخړه کې له يوه طرفه يوه اته کلنه ماشومه وژل شوې وه، ګڼ مالي تاوانونه يې ګاللی وو او لا يې هم ترمنځ ژور اختلافات موجود وو، چې مسؤلينو يې ترمنځ د سولې فضا رامنځته کړه.
د غوندې پرمهال د سرحدونو، قومونو او قبایلو چارو رئیس میا محمد ولي صدیقي په خپلو خبرو کې له ښکېلو دواړو لوريو وغوښتل، چې د راتلونکې لپاره له هر ډول شخړو او لانجو څخه ډډه وکړي او د سولې او ورورولۍ فضا لا ټینګه وساتي.
