د زابل ولايت په خاک افغان ولسوالي کې له خلکو سره يوه پراخه ولسي غونډه ترسره شوه
چهارشنبه ۲۶ صفرالمظفر ۱۴۴۷
د سرحدونو، قومونو او قبايلو چارو وزارت د لارښوونو پربنسټ د زابل په خاک افغان ولسوالي کې د ياد ولايت د سرحدونو، قومونو او قبايلوچارو رياست لخوا د سيمې له خلکو سره د اسلامي اخوت او ولسي ستونزو د اورېدو په مناسبت غونډه ترسره شوه.
په دغه غونډه کې، چې د ولايت والي الحاج ملا شير محمد شريف په ګډون د مختلفو ادارو استازو، علماوو او سيمه يیزو قومي مشرانو حضور درلود، د ولسي خلکو ستونزې واورېدل شوې، چې پکې د روغتيايې مرکزونو کمښت، د سړکونو خرابوالی، د کرنې او مالدارۍ نیمګړتیاوې او د ځوانانو لپاره د کاري فرصتونو برابرول شامل وو.
د يادې غونډې ګډونوالو ته د مسؤلينو له لوري د امیرالمؤمنین حفظه الله د فرمانونو په اړه معلومات هم ور کړل شول، چې پکې د ودونو، مړو او نورو مناسباتو کې د لګښتونو کمول، د جبري نکاح او ناوړه دودونو د مخنیوي، د انساني قاچاق پر ضد مبارزې او د قومي او سمتي تعصب څخه د ځان ساتلو ټينګار شوی وو.
