د غور له خلکو سره د ملت اتحاد، د اسلامي نظام بقاء او د ولسونو د هوساينې غونډه وشوه
پنجشنبه ۱۳ صفرالمظفر ۱۴۴۷ د سرحدونو، قومونو او قبايلو چارو وزرات د جرګو او قبايلي چارو د همغږۍ معين الحاج مولوي محمد علي جان احمد د مل پلاوي په مشري.
نن په غور ولايت کې له ولايتي مسؤلينو، ولسوالانو، متنفذينو او ولسي خلکو سره يوه ګډه لويه ولسي غونډه ترسر کړه. ښاغلي احمد د دې غونډې پرمهال په ډاګه کړه، چې د شل کلنې مبارزې هدف يې د الله جل جلاله نظام نافذول وو. نوموړي زياته کړه نن ولسونه خوشحاله دي.
ځکه د دين په رښتيني عقيده ولاړ دي. هغه په تېر شل کلن جهاد کې د فدايانو قربانيو ته په اشاره وويل: په هيواد کې د استقلال رڼا د هغو فدايانو د قربانيو برکت دی، چې د اسلامي نظام د بقا او ملت د عزت بنسټ لپاره يې ځانونه نذرانه کړل. وفاداري ورته زموږ او ستاسو مسؤليت دی.قومي مشرانو په خپلو خبرو کې د اسلامي امارت مسؤلينو ته د ډاډ په څرګنډولو سره وويل: موږ په رښتينولي کلک ولاړ يو، ستاسو له ملګرتيا به هېڅکله هم لاس وانه خلو او دا د اتفاق او يووالي څراغ به همداسې بل وساتو.
دوی همداراز د خپلو ستونزو د شريکولو ترڅنګ د ولسونو ترمنځ د شخړو او دښمنيو په لمنځه وړلو کې د يادو مسؤلينو هڅې وستايلې او دا يې د سولې او ثبات لپاره مثبت ګام وباله.
د غونډې په اوږدو کې د جرګو او قبایلي چارو د همغږۍ رئيس شيخ نيک محمد افغاني د امیرالمؤمنين حفظه الله هغه فرمان ولوست، چې د لوړو مصارفو، بې ځايه لګښتونو او ناوړه رواجونو څخه پکې د مخنيوي سپارښتنې شوې دي نوموړي له خلکو وغوښتل، چې ياد فرمان عملي کړي ترڅو له ګټو يې برخمن شي.
په پای کې د اطلاعاتو او عامه اړيکو رئيس مفتي تسليم الله حقاني وويل: د ولس خدمت زموږ لومړيتوب دی او دا چاره خپل وياړ بولو نوموړي ژمنه وکړه، چې دا سپېڅلې وجيبه به په پوره اخلاص، صداقت او زړه ورتيا ترسره کوي.
