زابل کې د دوو قومونو ترمنځ شخړه حل او سوله ييز ژوند يې غوره کړه
شنبه ۲ محرم الحرام ۱۴۴۷ د دغه ولايت د سرحدونو، قومونو او قبايلو چارو رياست مسؤلينو د قومي سپين ږيرو علماوو او اسلامي امارت د ځينو استازو په همکارۍ د دغه ولايت په شهري صفا ولسوالۍ کې د ځمکې د ملکيت پر سره راپورته شوې شخړه هواره او ښکېل اړخونه يې سوله ييز ژوند ته راوګرځول. د قومونو ترمنځ په دغه رامنځته شوې شخړه کې د اخ ډب له امله دواړو خواوو ته د څو تنو د ټپي کېدو برسېره لوی مالي زيانونه هم اوښتي وو، چې د طرفينو ترمنځ يې ژور اختلافات را ولاړ کړي وو. د ياد ولايت د سرحدونو، قومونو او قبايلو چارو رئيس د ولايت مقام له استازو سره يوځای سيمې ته سفر وکړ د طرفينو د اسنادو تر کتلو وروسته يې له هغوی اختيار خطونه واخيستل او د يوې شرعي فيصلې په کولو سره يې دواړه خواوې سوله ييز ژوند ته راوګرځولې. ښکېلو خواوو د مسؤلينو په ترسره شوې فيصلې د رضايت ترڅنګ له هغوی مننه وکړه، چې په وينا يې د دوی ترمنځ يې د خبرو او تفاهم له لارې سوله وکړه.
