په بامیان ولایت کې د دوو کورنیو ترمنځ پېښه شوې شخړه حل شوه!
سه شنبه۱۴۴۶/۶/٢٩
د بامیان ولایت د سرحدونو، قومونو او قبايلو چارو آمر حافظ محب الله سجاد د ياد ولایت مرکز د شهیدانو په سیمه کې د ديني عالمانو، متنفذینو او مصليحينو په همکارۍ د ترافيکي پېښې له امله د دوو کورنیو ترمنځ رامنځته شوې شخړه چې په نتیجه کې یې دوه کسان خپل ژوند له لاسه ورکړي وو، د خبرو او منځګړیتوب له لارې حل کړه او دواړه کورنۍ یې سره پخلا کړې.
حافظ محب الله سجاد له دواړو دښمنو کورنیو سره په جلا جلا ناستو کې د اسلامي شریعت په رڼا کې د يادو کورنيو غړو ته قناعت ورکړ او دې ته یې راضي کړل چې خپلمنځې شخړه ختمه کړي او په سوله کې ژوند وکړي.
په پای کې د دواړو دښمنو کورنیو مشرانو یو بل ته بښنه وکړه او په خپلو ويناوو کې يې وویل چې دښمني او منازعه د انسانانو ټولنیز ژوند له خطر سره مخ کوي. دوی دې ته متوجه شول چې نفرت پر ځای، په اشتی او ورورولۍ کې ژوند وکړي.
